الطريق الصحيح .. لجمع هدومى

بسم الله الرحمن الرحيم

السلام عليكم ورحمة الله وبركاته

بما ان والدتى (( امى يعنى )) بقالها كتير عايشة معايا ... او العكس صحيح فانه حتى الان لم تتمكن من الطريقة الصحيحة لمعرفة

هدومى .... وخاصة عند عملية الجمع .... للغسيل

ولا اعرف حقيقة الامر لماذا ... على الرغم من صغر العدد - الهدوم يعنى - وصغر مساحة الشقة

ولهذا احب انى اوضح هنا ... ومن مدونتى الشخصية ... الطريقة الصحيحة لمعرفة الهدوم دون اى لخبطة او دربكة مع هدوم شخص اخر

اخواتى يعنى

اولا :

البنطلونات : ان يتوافر فى البنطلون قطع واضح لا تخطئه العين اسفل القدم ... يعنى رجل البنطلون لازم تكون مقطوعة غير كدا يببقى اكيد اكيد مش بنطلونى

التى شيرت : انه يكون مرمى فى اى حتة ..... مكرمش دائما تشعر معه بالترهل ... يعنى يكون التى شيرت فىاى حتة على الارض على الكرسى فى المطبخ لو غيرت فيه عاتى يعنى ... وما يكونش مفرود يكون متكعور كدا وملموم فى نفسه

اما فيما يخص الشربات ... فاهى دائما وابدا قابعة داخل الكوتشى ولا تتركه

ومن هنا اشكر امى ... والدتى يعنى ....... على مجهوداتها المستمرة فى عملية البحث و السعى الدؤب فى جمع هدومى ... واحب اقولها
انا ما بتهددش ... ودا بسبب التهديد والوعيد الدائم ان اى هدوم مش هتكون ورا الباب او فى مكانها .... هيكون مصيرها السلم