تحية للمنصورة

بسم الله الرحمن الرحيم

اشهر حاجة عن المنصورة هى بنات المنصورة وجمال بنات المنصورة ... دا المعلومات المتوفرة عن المدينة دى عندى زمان

وكانت المرة الوحيدة اللى روحت هناك كانت كدا من ايام ما كنت بلعب فى الشارع ومتشرد اى نعم انا لسه معتزل من قريب بس اياميها كنت

صغير اوى ... وكان السبب فى الرحلة دى هو فرح بنت خالى محمد ... (( لسه فاكر ان اياميها كان المتنيل على عينه بتاع لولاكى ومصطفى قمر وايهاب توفيق على كيفك مين ..؟؟ ههههههههههههه اه والله فاكر الاغانى دى ))

وبصراحة كان حتة فرح تحفة كفاية الاكل اللى مش هنساه ابدا ابدا منطقة ريفية بقى

المهم كدا انتهت العلاقة بالمدينة اللى اساسا مابتديش غير ساعة الفرح وانتهت بردك ...

لكن فى الكلية ...بقى عرفت واحد من المنصورة او قريب منها .. تقريب مكان اسمه بلقاس على ما اتذكر ... وعاتى يعنى واد جدع بصراحة وعشرة على عشرة ... لكن بقى فى 3 كلية .. يالهوووووووووووووى .. شوفت حتة بنت .. ايه يا جدعان دا .. نموذج ..بنت شيك جدا .. مؤدية جدا .. ملتزمة .. بجد شياكة .. وبعد كدا بالصدفة عرفت انها من المنصورة .. اممممممممم

وخلاص بقى انتهى الموضوع برده على كدا

لكن بعد كدا اتعرفت على دورنا .. منصورية بردك ... عادى بقى .. شخصيات بتعرفها على فترات متباعدة بس من مكان واحد
الغريب بس هو ان الشخصيات التلاتة دول (( صحبى / محمدحسين والبنت بتاعت الكلية ودورنا )) خلونى رسمت للمدينة دى صورة انها مدينة جامدة جدا .. لانهم اخلاق ومحترمين وشياكة وادب وذوق بجد صفات جامدة جدا وفضلت الصورة دى عندى

ودخلت الجيش

كملت باحمد الوكيل .. واد الله اكبر عليه جدع لاقصى الحدود .. بصراحة يعنى ما شوفتش منه الا كل خير ربنا يهدى ويثبت على كدا
واتفرقنا وافتكرت انى مش هشوفه تانى ..لكن سبحان الله يطلع معايا فى الكتيبة

ونطلع مع بعض الشهر اللى فات ... وكمان بقى ايه باقى الناس اللى خروجوا معانا فى مهمة الشهر اللى فات منيين يا بنى منصورة .. وانت يا عم منصورة .. وانت يا حج منصورة .. ههههههههههههههههه

وطبعا الحكايات بقى ما بتنتهيش الكل بيحكيلى علىالمنصورة وجمالها والتطوير اللى فيها .. ولازم تيجى يعنى لازم تيجى .. نياهاهاها فى حد يجلى الفرصة دى ويقول لا بردك هههههههههههه
وخلاص يا جدعان ما بقتيش شايل هم العروسة .. ههههههههههههههههههههه العيال قالولى تعال انت بس ومالكش دعوة ههههههههههههه

وفى وسط كل دا افتكرت المكتبة المشهورة اوى اللى بتطبع كتب للمدونيين واللى للاسف مش فاكر اسمها .. وغير المدونيين اللى عرفتهم من المنصورة (( غروب ودكتورعمرو فاروق على سبيل المثال ))

عشان كدا تحية خاصة جدا لكل شباب المنصورة الجدعان بجد وبناتها الامامير

و

المشاية ..فندق شبرال .. جزيرة الورد .... والمكتبة اللى مش فاكر اسمها