ايمانى يزداد كفرا


بالامس اعلنت انه رأى خاص بى فقد
مجرد شعور استشعره ..نتائج لما عايشته

فازداد ايمانى كفرا

وهمست لافكارى وان كنتى فاسدة
ردت صامتة .. سفهً همسك لن يرد عليه

فازداد ايمانى كفرا

مرت الايام .. توالت الاحداث .. عناد
تكبر .. تجبر .. والجميع يرتقب .. وماذا بعد

فازداد ايمانى كفرا

توقفت وتمهلت عن الكتابة .. وصمت .. انحسار واحصار
ولم يكن الوقت ملائما للكلام .. فصرخات الالم تسود المكان

فازداد ايمانى كفرا

تسلم وسَلم وانقل بسرعة وتنحى .. وطيارة بطيرة بجناحات وام مروحة عدت
وخوف وقلق وتصفيق و ورد وفرحة .. وانا قلقان وزعلان وخايف ومرعوب

فازداد ايمانى كفرا

مرت الايام .. مشى بجد .. رحل ... هرب ... فى شرم فى السعودية !
لا دا فى المستشفى .. تعبان .. لا يقدر .. يعالج .. مكتئب ... فى السجن

فازداد ايمانى كفرا

محاكمات .. تحية عسكرية .. تمام .. رجله فى وشنا لعبه فى مناخيره ... انكرها كاملة
امنع تصوير .. امنع تصريح ... امسك شهادة .. لا دا حق ربنا .. وفريق على مشير على لواء

فازداد ايمانى كفرا

اسحل ... اضرب .. اعمل عبيط ومسك عبيط ... اشغل فى اى بتنجان .. ومحاكمات اى كلام
ايدى خفية .. فتنة طائفية .. عبلة وكاميليا ... رجالة ورق ... امبابة ....!!

فازداد ايمانى كفرا

ولاد البوبى على ماسبيرو رايحين ... امنع سخن ... اخص دول هيضربوا جيشكم
اقتل يا عم الجيش وريحنا منهم ... دول بتوع امريكا .. دولس بمدرعة مسروقة ! ورصاص ميت من اى حتة وخلص

فازداد ايمانى كفرا

وامسك تصريح بصلاحية لغاز يا مفتريين ... ومطابق يا ظلمة
وعين تنفقع مع شهيد على ارض بيمثل .. ودم رخيص من اجل الاستراحة والهدنة .. وظابط تعظيم سلام .. فقعت عين امه يا باشا !!!

فازداد ايمانى كفرا

ومسرح وفض واضرب والناس على كنبة بزرار واقلب .. واهانة ومسخرة وقلة ادب .. شعب بتاع حشيش صحيح
دماغ عالية وفن الاقناع .. وقنوات جدعة مهذبة .. واستقرار ... والعب ونط الحبل وارقص على نغم الانتاج

فازداد ايمانى كفرا

استمروا ... استمروا ... استمروا ... وقاله شيخ اسمه غنيم ... لو نزل قرآن ان الجيش هو القاتل !!
لكفر التابعين بالقرآن وصدقوا الجيش !!!

فازداد ايمانى كفرا

وطنا العنه فى اليوم مئة مرة واذكرة بكلمة حب مَرة
واشتد فى اشتياق الرحيل عنه وتركه للابد ... فيؤلمنى وطنى بدقاته فى جسدى


12 اكـــــــــــــــــتب رايـــــــك:

reemaas يقول...

انت عارف طبعا انى مش متفقة معاك :)

بس ماقدرش ماعلقش الكلام موجع اوى من كذا ناحية

موجع انك حاسس ده

وموجع بالنسبالى انها بقت كده فى نظر جزء من شباب بلدى

الكلام موجع للطرفين اوى

ولو ركنا احساس الالم على جنب فالتعبير روعة مش عارفه هو احساس مخلط كده عاجبنى الاسلوب ووجعنى الكلام ومش موافقة على الفكرة ههههههههههههه

AhMeD RaDy يقول...

ريماس

ههههههههههههه عارف عارف

اتفضلى دا شئ يسعدنى جدا على فكرة

دا واقع مس مجرد احساس

فى ناس تانية اكتر مش حاسة باى شئ وفى جزء تانى حاسس احساس عكس دا يبقى هم يكسبوا

على حسب اللى بيستقبل بقى

ركنا ...الله يكرمك دا من ذوقك والله ... بتحصل برده .. ماكنتش اقصد انه يوجع حد ... هو اعتراض وخلاص .. ماشى يا سيتى وانا احترم اعتراضك دا

Emtiaz Zourob يقول...

لا حول ولا قوة إلا بالله ..

ربنا معاكم ومع مصر الحبيبة ..

AhMeD RaDy يقول...

وجع البنفسج

ونعم بالله العلى العظيم القادر بقدرته

اللهم امين يارب اللهم امين

Unknown يقول...

بعض الكلام فاهماه و بعضه لأ .. بس الاسلوب جديد ..

اشكرك لزيارتك مدونتي ..

دمت بخير حال

AhMeD RaDy يقول...

ذات النطاقيين

ابقى تعالى تعالى واقراءى تانى وان شاء الله هيكون كل شئ واضح ... الله يخليكى دا من ذوقك

العفو دا شئ يسعدنى ان اعلق هناك

انطلقى

رحيق الورد يقول...

مساء الخير ..
الله يحفظ مصر الغالية وان شاء الله تتحسن الاوضاع ويصير كل خير
تحياتى لك
ياسمين

مصطفى سيف الدين يقول...

كلما ازدادوا تجبرا ازداد ايماننا كفرا
نعم يا صديقي انها ايام موجعة ترتبك فيها الافكار والمشاعر وتتخبط فيها الاراء ولا يتبقى شيئا الا ايماننا الداخلي وما تستشعره قلوبنا في لحظات اصبح الاعلام فيها مجرد شائعات
لنستشعر شيئا واحدا ان رصيدهم قد نفد وان ايماننا بهم يزداد ويزداد كفرا و كفرا ساعة بعد اخرى
هذه اول زيارة لي هنا واستمتعت بخاطرتك الرائعة
تقبل مروري

AhMeD RaDy يقول...

مساء الفل

يارب يارب يارب يارب تتحسن الاوضاع يارب ونكون افضل

وتحياتى لكى ايضا يا ياسمين

AhMeD RaDy يقول...

مصطفى

فعلا .. هيزداد ايماننا كفرا

واه من الاعلام ... وما ادراك بغسيل المخ الطويل .. وشعور الانسان بعدم الامان لان الثورة قامت

ميزان مقابل الجميل القبيح ! انهم يريدون وقف المسيرة لان النضافة تخيف الجراثيم

سيستمر الايمان بالحرية يستمرالايمان يزداد كفرا بالقبيح والسئ

بالعكس اننى سعيد جدا بهذا التعليق وانتظر منك زيارات اخرى فى المستقبل باذن الله تعالى

دعاء العطار يقول...

يابلد معانده نفسها ... ياكل حاجه وعكسها ازاى وانا صبرى انتهى لسه بشوف فيكى امل ؟ .. طارداك وهى بتحضنك وهو ده اللى يجننك ... بلد ماتعرف لو ساكنها ولا هى بتسكنك .. بتسرقك وتسلفك ظالماك وبرضه بتنصفك ... !

هى دى باختصار مصر ... فيها كل التناقضات ... تلاقى ناس بتمووووووت وعينيها بتتفقع ويقولولك ماجورين ؟!

ماجورين ازااااى هى كنوز الدنيا تعوض العين او الروح ؟!

شباب زى الورد بيموت اللى دكتور واللى شيخ وبنات محترمه تتشد من شعرها وتتسحل وتتعرى ويقولك هما اللى فى التحرير عايزين ايييييييييه ؟؟؟!!!

هيكونوا عايزين ايه ... ناس غاويه شحططه ومرمطه وضرب وبهدله يعنى ؟!

احنا مش بس ايماننا هيزداد كفرا بمجلس كنا واثقين فيه .. لاء احنا هنندم ع اليوم اللى صدقناه فيها وكنا سذج

ربنا يحمى مصر ويحمى شبابنا اللى اتظلموا من ناسهم قبل اللى ضدهم

اول زياره ليا هنا يااستاذ احمد بس بجد عجبتنى المدونه واكيد هتلاقينى هنا ع طول واسفه ع الاطاله :)

AhMeD RaDy يقول...

دعاء العطار

اوجزتى بانجزتى بصراحة فى الكلام دا .. بس هنعمل ايه بقى اذا كان دا حالنا وحالها

اه .. واخدين كنتاكى و50 جنيه وخيمة !! ويلا يا شباب مصر نفقع عينكم هناك هتموتوا بس !!

اه غاويين امل ايه ..م واخدة بالك انهم بتوع شحططة ومرمطة يا دعاء

ياااااااااااااه بتفكرينى باخويا الكبير .. اعد اقوله من اول يوم 28/11 هيخربوها .. هيخربوها .. دول بتوع حسنى يا عم الحج .. وهو يقولى لا يا عم دول بتوع مصر ... وطلعوا عند حسن ظنى بهم ... باعوا البلد وخربوها !! والناس اللى استقبلتهم بالورد .. دلوقتى بتحدفهم بالطوب .. اصحوا بقى ... بس يارب ما تنسوش انهم بيقبضوا من فلوسنا


واه من ناسهم يا دعاء
ناسهم بهدلوهم وطلعوا عينهم ومن الاخر كدا ناسهم من كتر الغشاوة مش عارف بصراحة يتقال عليهم ايه !!!

واول رد ليا على اول رد ليكى ويا استاذ دعاء انتى نورتينى جدا اكيد ومنتظر منك بقى زيارات كتير .. اطالة ايه ! منتظر ردود بجد انتى ردك دا قلبة وقومة يا استاذ دعاء

وانطلقى

Copyright © 2008 - AhMeD RaDy - is proudly powered by Blogger
Blogger Template