يا ترى هتشوفى الكلام دا !



بسم الله الرحمن الرحيم

السلام عليكم ورحمة الله وبركاته

يا خسارة كنت عايز اغير القالب بتاع المدونة وقولت اهو كم يوم كدا واطلعها بشكلها الجديد ولكن ما فيش فايدة برده مش عجبنى حاجة .. عاااااااااااااااااااااااااااااا

اكبر غلطة بقى عملتها انى مش قولت لها بحبك .. يا ريتنى قولت لها كدا وش .. بحبك يا مجنونة تصورى !

الكم يوم اللى فاتوا حصل حاجات غريبة .. كان فى كم واحد كدا فى العيلة ماتوا ... الحمد لله كله بيعدى

كان نفسى اليومين دول بالذات اشوفِك انتى بالذات جنبى .. كان نفسى بجد اكلمك اوى

لما تعبت وعملت كشف النضارة .. كنت فاكر ان اول حد هيقولى الف سلامة انتى !

رغم كل شئ انا بحترمك قبل ما احبك وعمرى ما هكتب ولا حتى بينى وبين نفسى بكلمة غلط او وحشة

اعد مع ابن عمتى .. قالى يا احمد حدد هدفك .. وسيبك من حوار الشهادة دا .. وركز وصدقنى انت تقدر تعمل كتير بس ظروفنا هى اللى بتحتاج صبر .. اعد اقول هو دا اللى نفسه اقوله ليكى .. بس مش عارف اذا كنتى هتصبرى معايا ولا لا !

مش فاكر لسه بعض الوصايا .. اتكلم مع مامتك يا احمد ... اول لما تدخل البيت اغسل الشراب .. وعلق هدومك .. ورواء مكانك ! صدقينى بقيت بعمل كدا .. بس مش بغسل شرابى وبقيت بعد مع ماما .. وبعلق هدومى ولو ما فيش مكان بحطها بنظام .. وبطبق البطانية كل يوم قبل ما انزل

فاكر تشجيعك انى اعمل حاجة . ما نسيتش على فكرة لكن بجد غصب عنى .. انا بحاول اتصل بالمركز عشان اظبط مواعيد الامتحانات
ولسه هحاول تانى !

حاولت اقرب على فكرة ورجعى نفسك وانتى تعرفى .. بس ردك كان دمه تقيل اوى خلانى محاولش تانى

كان نفسى اوريكى شكل النضارة ... ههههههههههه اختى بتقولى شكللك بقى محترم .. وطبعا انتى ما هتصدقى !

اه .. ايه اخبارك .. تصدقى بجد وحشتينى اوى .. وحشتنى لماضك .. وحشنى كلامك اوى .. فاكر لما قولت لى انت فعلا مش ينفع تذاكر مع بنات ! هههههههههههههههههههههه

اه .... مش قولت لك ان الزمالك وطن .. شوفتى بقى .. زيه زى مصر .. ! الاتنين محتاجين ادارة .. وبحب الزمالك اوى

عارفة سبب المشكلة ايه .. انى كنت فاكر انك هتعرفى لوحدك انك مش زى اى حد ومش هينفع تكونى زى اى حد اساسا وعلى فكرة هتفضلى كدا مهما كان ومهما حصل

بدعيلك بجد .. ونفسى اشوفك احسن حد فى الدنيا .. !

اه صحيح فى حاجة كان نفسى اوى اقولك عليها بس صدقينى مش هينفع اقولها الا بينى وبينك .. وانا عارف انك كنتى هتوافقى على الموضوع دا .. بس محتاج رائيك بصراحة !

اه .. هو انا قولت لك انى بغير اوى !!

بس بقى انا شكلى صدعتك اوى وكفاية اللى انتى فيه




12 اكـــــــــــــــــتب رايـــــــك:

P A S H A يقول...

لا يا أحمد أنت ما صدعتنيش ولا حاجة
ها بقى .. موضوع إيه اللي كنت عاوز تاخد رأيي فيه ؟؟
:D

وربنا أنت معلــم ،، ربنا ييسر لك الأحوال يا رب


ملحوظة : ما تنساش تغسل شرابك

:)

مصطفى سيف الدين يقول...

اوبا البيه زملكاوي :)
اهلا اهلا بيك في نقابة المحروقين دمهم
كده اعتقد قربنا نبقى اغلبية في بلوجر :)
بجد احلى حاجة لما تكتب احاسيس و مشاعر بتلقائية تلاقي القلم عايش مع نفسه وبيكتب وبس في النهاية بتلاقي لوحة مرسوم فيها انت
البقاء لله في اللي ماتوا من العيلة
والف حمد الله بالسلامة بعد كشف النضارة اهوه انا قلتلك قبلها :P
رائع يا صديقي

دعاء العطار يقول...

أنا بحب جداً الكلام التلقائى اللى طالع من القلب

لانه بجد بيوصل للقلب

"
بدعيلك بجد .. ونفسى اشوفك احسن حد فى الدنيا .. ! "

الجمله دى خلت عنيا دمعت .. حاساها صادقه اوى .. وممكن لانى شايفه ان الحب اللى بجد هو اللى يكون نفسك ان اللى بتحبه يكون احسن حد ف الدنيا وتدعيله وتتمناله الخير حتى لو بعيد عنك

ع فكره حتى لو ماشافتش الكلام ده .. ف الاحاسيس الصادقه بتوصل .. ولو جربت مره تقرب وفشل ... امممممم ممكن تجرب تانى .. مش يمكن تنفع المره دى

.........

ملحوطة : انا حاولت اعلق ع البوست اللى فات مكنتش عارفه ادخل البلوج اصلا وكان فى مشكله

دمت بخير

miroooo يقول...

جميل اوى فكرة البوست
ان شاء الله هتشوف الكلام وان مشفتهوش هتحس بيه متقلقش و لو هى بتحبك صحيح اكيد هتصبر بس انت اوعى تتخلى عنها
بوست جميل اوى
على فكرة يا ابو حميد انا معرفتش ادخل من كام يوم كده انت كنت قافل المدونة ولا ايه؟؟
لو كنت قافلها يبقى ياريت متتكررش تانى

miroooo يقول...

طبعا هتقول ايه السؤال الغبى ده
سورى انا افتكرت انك قولت انك كنت ناوى تغير حاجة فى المدونه
معذرة

reemaas يقول...

انا جيييييييييييييييت

اولا مبسوطة ان الرساله وصلت وكنت هقولك اتصرف ووصلها:)

بكره لحظة الندم بتاعه ياريتنا قولنا دى


انت زمالكاوى؟!!!!!!!!!

قولى الموضوع اللى عاوز رائيها فيه وانا اوعدك سرك فى بييييييييييير :D

AhMeD RaDy يقول...

PASHA

ههههههههه الله يكرمك يارب بجد ضحكتنى

هقولك بس بينى وبينك برضه

الله يخليك يارب دا انت اللى معلم كبير جدا

هحاول ولو انى نفسى اعمل الموضوع دا بجد :d

AhMeD RaDy يقول...

مصطفى

اه ههههههههههه

يا اهلا وسهلا بيك بس خلاص بقى الواحد قدم لا دا احنا اغلبية من بدرى اوى بس الظروف بقى

يا مصطفى هى مجرد محاولات للكتابة مش اكتر ويمكن الواحد بيحاول يطلع بس برده بحساب والحمد لله

ونعم بالله

ههههههههههههههههههه اشطة دا دائما فى الطليعة وفى المقدمة الله يسلمك يارب

انت اللى اروع بتعليق الحلو دا

AhMeD RaDy يقول...

دعاء

وانا ساعات مش على طول لانه ساعات بيظلم صاحبه !

لما يكون فى حد عنده استعداد هيوصل

ليه كدا بس .. ربنا اللى يعلم بجد .. انا احترامى ليها وتمنياتى ليها بالافضل اعتقد يفوق اساسا تمسكى بها لانها تستحق .. وانا شايفه كدا

اعتقد فى الوقت دا ما بقتيش تفرق تشوفه او لا .. اللى حصل حصل خلاص ورد فعلها كان مفهوم كفاية انى مش احاول تانى

وبلاش موضوع اصل دى حركات البنات .. لانى بتعامل كدا .. رفضك يبقى رفض ما بفهمش موضوع يمتنعن وهن الراغبات !! ما ليش غير تفكير واحد .. اللى ظاهر امامى فقط ! ربنا هو اللى عالم الباطن مش البنى ادمين !

البولج تحت امرك فى او وقت .. وتاكدى باذن الله اى تعليق هرد عليه حتى لو كان اول تعليق فى فى اول بوست

AhMeD RaDy يقول...

miroooo

ربنا يارب يكرمك دا من ذوقك

ههههههههههههه مش هتفرق يا ميرو على فكرة هى قرارت واحترم قرارها وربنا يكرمها ان شاء الله تعالى .. على فكرة انا مش بسيب حد ومش بتخلى عن حد لكن ما ينفعش حد يسبنى ويقولى مع نفسك انت وابقى تعالى !!

انتى اللى اجمل

لا ابدا هو بس محالوة لتغير قالب المدونة فقط ! مع استرخاء ايضا :S

مش هتتكرار تانى ان شاء الله

AhMeD RaDy يقول...

miroooo

هههههههههههههههههههههههههه لا ابدا ولا يهمك وانا رديت على ردك دا بالذات لانه بيحصل معايا الموقف دا كتير :S

AhMeD RaDy يقول...

reemass

هههههههههههههههه تصدقى انا لسه كنت هقولك نورتى لائيت النور قطع ههههههههههههههه

اممممممممم ابقى كداب لو قولت لك انى فاهم حاجة ؟؟؟؟؟؟؟؟؟؟؟؟؟؟؟؟

ومين سمعك بس مش بايدينا دايما .. ساعات بيكون غصب عن الواحد

وافتخر بشدة

ههههههه ودا يبقى اسمه سر برده يا رمضان !!!

Copyright © 2008 - AhMeD RaDy - is proudly powered by Blogger
Blogger Template