فى حاجة كمان ..........؟؟

بسم الله الرحمن الرحيم

انا بجد حاسس انى متسلطن على الاخر .. هتقولوا لى ليه هقولكم لانى اول مرة الائى مودى اللى من جوة

اكتشفت انى فى حاجات كتيرة جدا تقدر بها تددى لنفسك معالم هقولكم مثل صغنن لكن عندى كان ليه معنى كبيرررررر

انا اليومين دول لائيت نفسى بدور على سيد مكاوى .. انا الرجل دا بحبه جدا على فكرة .. وفجاة بقيت بنزله كم حاجة كدا كنت بسمعها من زمان

كدا تحلو الايام والليلة الكبيرة .. اه والله بجد .. بحبهم اوى وخلى شوية عليا وشوية عليك وكم حاجة لمحمد فوزى وعبد الوهاب ( انا بسمع من غير ليه دلوقتى بحبها اوى بجد )

حاسس انى فى حاجة جوية مبسوطة .. انفصلت شوية عن الهبل الجارى بالخارج .. وبجد شئ مريحنى شوية

فى حاجة كمان ...

انا حاسس ان فى مفهوم مختلف للحب للاسف ساعات مش باخد بالى منه .... ان الحب بجد من غير كرامة يبقى اهانة

وان الحب بيجى كدا قضاءا وقدر ... فى حاجات حلوة كتيرة تستحق الاهتمام .. تستحق نظرة مختلفة شوية .. محتاجة

بجد ان الواحد يدرك ان مفهوم الحب واسع .. مش لازم اكون على ارتباط بفتاة عشان احس احساس الحب .. لان

المفروض الاحساس دا يكون شئ واقعى ملموس .. يساعدنى انى اكتسب احترامها وعقلها قبل قلبها ..

فى حاجة كمان ....

التفكير شئ كويس جدا ... والحنيين للماضى وقدرتك على تسترجع ايامك الحلوة شئ رائع .. والايام الحلوة بتبقى مع

الاصحاب والاصدقاء والعائلة .. بجد ايام حلوة اوى .. مش مرتبط بشخص ولا بحد معين دى اشياء بتتحفر فى عقلك

.. بفتكر يوم ما اضربت عشان كذا .. ويوم مااخد 13 غرزة فى القدم و3 قرب قصبة رجلى بسبب العجلة .. وبعد ما

اتحركت .. ركبتها وانا لسه برده متخيط ههههههههههه

فى حاجة كمان ....

الشغل شئ بالنسبة ليا حياتى .. بحبه جدا مهما كان .. عارف انى مش محترف لكن ان شاء الله هسعى اكون كدا ...

ومش هتسربع ماشى يا عنب

فى حاجة كمان ....

انا بجد مش عارف اذا كان ينفع اتكلم شوية عن احلى اخوات بنات فى الدنيا .. بجد بنات زى العسل ... كنت دايما مش

بحب اتكلم مع بنات . مش لشئ معين .. كنت دايما فى دماغى ان اى بنت اى ولد يكلمها يبقى بيحبها وهيتجوزوا ...

ههههههههههه اه والله موضوع انك تتناقش مع بنت كان مش فى دماغى نهائيا .. بس بصراحة انا بشكرهم جدا كل

البناويت العزيزات المحترمات العاقلات اللى بين وحين واخر يدور حوار مابين الهزار والضحك والجد والمواقف الثابتة

والمبادئ .. فى منهم اللى لفت انتباهى لاشياء هامة جدا ... انا بذكر البنات بالذات لان للاسف الشديد .. معظمهم عن

طريق النت .. واتمنى ان اقابله فى الواقع .. وبصراحة انا كل شخصية منهم محتاجة اعد اقولكم عنها حاجات كتيرة جدا

بشكرهم بكل امتنان عن المساعدة المعنوية الجامدة فى اوقات الشدة

فى حاجة كمان ....

الهزار والضحك شئ ممتع جدا وخصوصا لما يكون اللى ادامك فاهم وعارف مخك وان كلامك لا يحتمل معانى خبيثة ..

وانك بتتكلم بطريقة واضحة ومابتشيلش الكلمة اكتر من معنى


فى حاجة كمان .....

الالتزام الدينى والاخلاقى عمره ما كان معناه الانغلاق ..... انا مش موعظ دينى ... لكن بجد بحس اد ايه انا بكون

منطلق لما بلتزم بالعبادات

بحس بطاقة غريبة وراحة بتساعدنى اعيش وابص للدنيا على انها واسعة اوى ورحبة جدا .. وشعور ان ربنا جنبك ..

هقولكم على حاجة ساعات كتيرة بحس ان ربنا هو اللىبيعلمنى .. دا احساس .. المواقف والافعال والدلالات .. كله بجد

بيحسيسنى ان ربنا معايا على طول على طول ... فى سنة اولى كلية شيلت كمبيوتر ... مش عشان انا امتحانت وفشلت

لا .. لكن عشان كنت فاكر الامتحان الساعة 10 وهو الساعة 9 فامدخلتيش

اتصطدمت اوى ... بصراحة واتغظت لان المادة مش مستاهلة .. لكن حسيت بشئ جوايا بيقولى قول الحمد لله ..

وفضلت من كليتى لحد البيت اقول الحمد لله .. ما بطلتش .. وصليت فى البيت ركعتيين شكر ... وفصلت الفون ...

وركزت فى اللى بعده .. وركزت للتعويض وربنا كرمنى اخر كرم .. رغم انى كنت بشتغل مع الدراسة لكن حكمة ربنا

ارادات ان اخد القلم فى مادة عبيطة زى دى .. وتصوروا ان الكمبيوتر فى السنة دى شيلها 90% من الدفعة

ههههههههههه عشان الكهربا قطعت

فى حاجة كمان ......

شكرا لكل انسان مر من هنا ولو بالصدفة شكرا لكل اللى بيردوا على البوستات بتاعتى .. وتحياتى للجميع